Paghihiwalay

Iniwan mo akong kapiling ang lagim
Para iyong sundan ang mabining ulan,
Walang tigatig kong niyakap ang dilim.

Ang katotohana’y naglabas ng talim:
Habang mga daho’y nagkukulay-haban,
Iniwan mo akong kapiling ang lagim.

Nagdamot ang langit, gabi’y makulimlim
Pagkat nagluluksa’ng pintakasing buwan.
Walang tigatig kong niyakap ang dilim.

Di mo inunawa’ng samong mataimtim:
Hindi na ba ako ang ‘yong kasiyahan?
Iniwan mo akong kapiling ang lagim.

Ang mundo ko ngayo’y  naging kulay itim,
At ang liwanag ay di na matagpuan.
Walang tigatig kong niyakap ang dilim.

Ang iyong pag-ibig na ubod ng sakim
Ang tanging tumapos sa ‘king kabuluhan.
Iniwan mo akong kapiling ang lagim,
Walang tigatig kong niyakap ang dilim.

*Ang larawan ay mula dito.

Anything?